العراق

العراق ...
اللي نطرته اسنين يابو اسنين
مسرح صار للعفنين
مسرح .. للخطف والذبح والتفجير
العراق.. الچنت اوزع بي مناشير
العراق.. الچان وحده ايعاند الدنيه
اول من كتب عالطين
مهد اول حضاره انولدة ابهلكون
يا اشور .. ياسومر وبابل
والسوالف والمضايف والفناجين
ياعاشگ ايون ابگلب البساتين
يا سعف النخل والبرحي والقداح
يا بلبل سكر من عسل تينه
وغنه مرتاح
يا شمس الظهر.. يا تعب فلاح
يا چاي العصر واتدير الاقداح
يامصباح ...
يلباگوا ضواك ومنعوا الراح
يل خلوك بس دم وحزن ماتعرف الافراح
كل ليله اشد جرحك ..
واتصبح جديده جراح
اشكثر داست عليك اجيوش يابو اجيوش
گمت من کبوتك مثل المهر ..
ما همك السفاح
چم باغي ونذل ..
سل سيفه ضدك حته لا ترتاح
چم موتور ..
فجّر حقده بصفوف المدارس
والمساطر والمساجد والكنائس
هذوله موبشر .. عارات
يخافون الاغاني والضوه
وحتى المنارات
هذوله ابدم شعبنه الطيب ايسكرون
على هيئة بشر بس عدهم گرون
فتوا فتوات سوده..
اتحلل ابذبح العراقيين
حته ويه النبي بالجنه يتغدون
بريئ الدين من كل حاقد وغدار
ورموز الظلام اللابده ابسده
معقوله اليذبح ابرياء الناس
ويه النبي يتغده
عراقيين نبقه ولا يهزنه الريح
بحر مهيوب دوم ابجزره وابمده

اللهم خلص العراق ممن هم فيه يا الله وانصرهم يالله وانصر اهلنا في فلسطين وباكستان وافغانستان لن انساك يا عراق وانصر الاسلام والمسلمين امين


بنت فلسطيييييييييييييييييييييييين

روووووووووعة يعطيكي العافية اختي الغالية امونة