كَــانْ يَـامَـا كَــانْ .. يَـا سَــادَةْ يَــا كِــرَامْ
من قصص التراث الشعبي الفلسطيني
فلسطين بعتت سلام للجميع..
و حكتلي...
قولي لولادي..
اشتقت كتير للقعدات الحلوة..
ضو القمر..و قلوب الحبايب..
و القصص الندية..
و الحكاوي..
تعالوا لنرَجع ايام زمان..
كل يوم قصة ..كل يوم حكاية..
مش لحتى انّام..
عشان يصحى فينا اشي ما بينام..
ليالي كانت في فلسطين..
و قصص نحكيها لنبقى احنا في الوطن عايشين
فلسطين بتسلم عليكم..
و بتقولكم....
حكاية الكووك
كان يا ما كان.... في قديم الزمان، وما يحلى الحكي إلا بذكر النبي... عليه الصلاة والسلام...
كان في عصر الجيش العسملي... يعني أيام الأتراك لما كانت تحكم فلسطين...
كان في فلاح اسمه درويش... وهو مسكين درويش... يمعط الجاجات ويسرق الريش... أهبل على باب الله... وكانت زوجته فهيمة ...فهمانة... بس غلبانه بعيشتها وبمشاكلها مع زوجها الأهبل درويش... يوم ضاقت الدنيا بوجهها... وطفرت الحالة عندها... قالت له:
خذ البقرة اللي حيلتنا... وروح على المدينة وبيعها في السوق... يمكن تجيبلك عشره أو عشرين ليره...
وقامت فهيمه حطت الزاد والزواده لدرويش، وسحبت البقرة وسلمتها له... وقالت له:
اتكل على الله وروح للمدينة... وإرجع قبل ما تغيب الشمس.
سحب درويش البقره... وفي الطريق تعب وجلس يرتاح تحت شجره... وربط البقرة في الشجرة... وفرش منديل الزاد والزواده... ولسه بيقول بسم الله... سمع صوت القوقه (الغراب) فوق الشجره... نظر درويش فوق... وقال لها:
إيش يا قوقه بدك تشتري البقرة...
قالت القوقه:
كوك.... كوك.... كوك
قال لها:
طيب... بتدفعي عشرين ليره.
قالت القوقه:
كوك.... كوك.... كوك
قال لها:
وين المصاري.... تحت الشجرة....
قالت القوقه:
كوك....كوك.... كوك
قام درويش حفر تحت الشجرة... شاف جرة فخار كبيره مليانه ذهب... ليرات ذهب عسمليه... عد عشرين ليره ذهب... ورجع الباقي... ودفن الجرة زي ما كانت... واتطلع فوق... وقال:
هذه البقرة الله يبارك لها فيها... وأنا أخذت حقها والباقي رجعته مطرحه....
قالت القوقه:
كوك.... كوك.... كوك
ودع القوقه وروح على بيته...
استغربت زوجته فهيمة برجوع زوجها قبل موعده... فقالت له:
ما أسرع ما رجعت... وين البقره؟
قال لها:
بعتها للقوقه بعشرين ليره ذهب.
شافت المره الفلوس الذهب وانهبلت... وشدت في خناقه... وما فكته إلا لما حكى لها القصه من طقطق لسلام عليكو...
شافت المره الفلوس الذهب وانهبلت... وشدت في خناقه... وما فكته إلا لما حكى لها القصه من طقطق لسلام عليكم...
قالتله:
الله يعطيك العافية
وراحت بسرعة لعند الشجرة... وشافت البقرة مربوطة في مطرحها... بحشت على الجره... ولقتها مليانه ذهب عسملي... حملت الذهب وخبته في أواعيها، وسحبت البقره ورجعت ع البيت... لما شافها درويش صار يصرخ ويلطم على وجه ويقول:
حرام عليك يا مره تسرقي بقرة القوقه
خافت فهيمه أن يشكيها الأهبل للحاكم.... راحت عملت زنقل و زلابيه (حلوى مثل العوامه "لقمةالقاضي") وطلعت فوق السطوح وصارت ترمي عليه... وهو فرحان يلقط ويوكل... ويقول:
يا سلام يا أولاد... الدنيا بتمطر زنقل وزلابيه
وفي يوم زعل درويش من مرته فقال والله لروح للحاكم وأقول أنك سرقت بقرة القوقه واخذت مصاريها...
ما اهتمت فهيمه من كلامه وتهديده....
راح الأهبل للحاكم وحكى له القصة من طقطق لسلام عليكم... استدعىالحاكم التركي فهيمه وسألها عن البقرة وجرة الذهب... فقالتله:
سلامه تسلمك يا سيدي الحاكم... زوجي أهبل ومجنون... بيتهيء له أشياء مابتصير.... وإذا مش مصدقني اسأله وقتيش صارت هذه الحكايه؟؟؟
سأله الحاكم... فقال الأهبل:
يوم ما مطرت الدنيا زنقل و زلابيه...
ضحك الحاكم وقال لفهيمه:
الله يعينك على هاالزوج...خوذي زوجك وروحي على بيتك
قامت فهيمه ولمت عفشاتها ورحلت من بربره على بيرالسبع...
وتوته توته خلصت الحدوته
جبينة
كان يا مكان في قديم الزمان هالمرة(إمرأة) لا بتحبل ولا بتجيب . يوم مر بياع هالجبنة ؟ قامت قالت :" يا طالبة يا غالبة تطعمني بنت يكون وجهها أبيض مثل قرص هالجبنة ؟" الله نطق علسانها حبلت وجابت هالبنت وجهها أبيض مثل قرص الجبنة , وسمتها ( جبينة )
لمن كبرت جبينة صارت حلوة كثير , وصرن بنات الحارة يغرن منها ., يوم رحن رفقاتها قالنلها :" يللا يا جبينة نروح نلقط دوم ". قالتلهن :" غير ما تقولن لإمي " .
رحن قالن لإمها :" ياإم جبينة بحياة جبينه تخلي جبينة تيجي معانا نلقط دوم ." قالتلهن :" أنا بخصنيش . روحن قولن لأبوها ."
رحن قالن لأبوها:" يا أبو جبينة بحياة جبينة تخلي جبينة تيجي معانا نلقط دوم ." قالهن :" أنا بخصنيش . روحن قولن لعمتها ".
رحن قالن لعمتها :"يا عمة جبينة بحياة جبينة تخلي جبينة تيجي معانا نلقط دوم ."
قالتلهن:" أنا بخصنيش رحن قولن لخالتها ".
رحن قالن لخالتها :" يا خالة جبينة بحياة جبينة تخلي جبينة تيجي معانا نلقط دوم
قالتلهن خالتها :" طيب خليها تروح ". سحبن حالهن هالبنات و رحن يلقطن دوم وصلن شجر الدوم قالن :" أني اللي بدها تطلعلنا عالشجرة ؟ جبينة كانت أصغر وحدة و أعقل وحدة قالت :" أنا بطلع ".
". طلعت وصارت قطعلهن دوم وتسقط تحت الشجرة . قالنلها احنا بنملليلك جونتك (الجرة). ملين جونهن دوم وملين جونتها حلزون . صارت الدنيا مع الغياب دشرنها ع ظهر الشجرة وروحن ع دورهن .جبينة ما عرفتش تطيح عن الشجرة وصارت الدنيا ليل راحت إمها سألت رفقاتها قالنلها جبينة ما راحتش معنا .
بعدين إجا هالخيال راكب هالفرس صارت هالفرس تقدم على هالشجرة و ترجع لورا خايفة , اطلع ع هالشجرة شاف هالبنت قالها :" طيحي عن هالشجرة " مارضتش لأنها خايفة قالها :" قالها :" عليكي الأمان و أمان الله ردت هالبنت وطاحت و ركبها معاه عالفرس وروحها معاه
بالليل جبينة دهنت حالها كلها أسود عشان بدهاش حدا يعرفها , الصبح فكروها عبدة صاروا يودوها تسرح بالغنم و الطرش صارت جبينةكل يوم و هي سارحة بهالطرش تقول "
ياطيور طايرة في جبال عالية
ترعى غنم ترعى نوق وتقيل تحت الدالية
سلمن ع امي و أبوي وقولن جبينة راعية
وتصير تبكي , وتصير هالطيور تبكي و الغنم و هالطرش تبطل توكل و تصير كلها تبكي . لاحظ ابن الأمير انه هالطرش بروح عالمرعى ويروح بدون أكل , كل يوم بضعف عن يوم .
قال :" والله غير ألحقها و أشوف شومالها ."
لحق الطرش . لمن وصلوا ع المرعى قعدت جبينة و صارت تقول :
ياطيور طايرة في جبال عالية
سلمن عامي و أبوي وقولن جبينة راعية
ترعى غنم ترعى نوق وتقيل تحت الدالية
وتصير تبكي , وتصير هالطيور تبكي و الغنم و هالطرش تبطل توكل و تصير كلها تبكي, ووقف صار يبكي وكل شي موجود حوليها صار يبكي .وهو ابن الأمير وقف وصار يبكي .
المغرب , قالها :" تعالي , قري الصحيح . مين انتي , وشواللي صار معك ؟".
قالتله :" أنا اسمي جبينة , وصار معي هيذ هيذ هيذ ."
وقامت هالشحار الأسود عن وجهها المشحرة و الا هي شو ؟ مثل القمر .
إجا ابن الملك املك ( و أملك يعني عقد قرانه عليها ) عليها وقاموا هالأفراح و هالليالي الملاح , وتجوزها وجابت امها و أبوها لعندها
وجيت من عندهن وجاي
وطار طيرها و عليكم غيرها
موضوع: تعالو نحكيلكم حكاية قبل ما تناموا من حكايات ستي الختيارة 
الأحد 27 يونيو 2010, 18:57
