قصيدة حب باللهجة الجزائرية...باللهجة نتاع بلادي

للاحبة
والاصدقاء ولكل عاشق ولهان كلمات في صميم القلب

باللهجة نتاع بلادي

يا للي سألتني عن الحب = و قلتلي بالله خويا وعلاه
ما تحاولش كاش ما تكتب = وتقولي برك وين نلقاه
عييت نقلب شرق و غرب = وين يقولولي نستناه
لقيتو كامل كذب في كذب = ما تلاقيتو ماعرفت معناه
لا قريب و لا صاحب = و لا حبيب نعيش معاه
حياتي كامل و أنا نجرب = واحد ما لقيتو يسواه
مانيش فاهم هذا القلب = و كأنه ضد مولاه
يحب يشقى يحب يتعذب = يحب الواحد لي ينساه
و ساعات تلقاني نحب = لي يكرهني نجري موراه
و لي يحبني و ليا يقرب = نهرب عليه مافهمتش علاه
حاول خويا كاش ماتكتب = الجواب راني نستناه
راح نحاول باش نجاوب = و ماراكش وحدك حاصل لله
هو الحب هكذا يحب = يجري و يطوع مولاه
مايفيدوش معاه تجارب = ما يفيد ملك و لا جاه
شحال طوع من محارب = و حسرة شحال من فارس بكاه
و جيت لعندي أنا نجاوب = و الله ماراني فاهم علاه
راح نديرلك واش راك تطلب = على ما نظن و العلم لله
أنت قلبك راه مخرب = و ما راكش عارف حتى وين راه
دير في بالك هذاك الحب = لي يهرب و أنت تجري موراه
و لما يجري و أنت تهرب = عمرك ماتقعد معاه
على خاطر هذا لعب = مديور للي يتبع هواه
ما تنال منو غير التعب = ديرو كيما خيالك و انساه
فرغ قلبك و عاود رتب = و خلي عقلك يخدم معاه
و قبل ما تحب لازم تحسب = باش كي تمدو تمدو لمولاه
هيا نبداو من أول حب = ….أول حب هو الله
لي عطاك هذاك القلب = لي راك تحوس باش تملاه
و لوكان ليه تقرب = أقرب منك رايح تلقاه
ماشي كيما الحب لي يهرب = و انت تبقى تجري موراه
و بعده يجي ثاني حب = هو حبيبنا و حبيب الله
عليه الصلاة و السلام تعب = باش وفرلك الدين تقراه
حبو علي و عليك واجب = سعدو المرء للي بغاه
المرء يحشر مع من يحب = تخيل روحك قاعد معاه
و من بعد ثالث حب = أنه الواحد يحب يماه
تسع شهور و هو يتقلب = و هي مسكينة تتقلب معاه
سنين و سنين و هي تتعذب = وين يطيح يلقاها حداه
حتى نهار يولي شايب = يبقى طفل في عيون يماه
و من بعدها رابع حب = أنو الواحد يحب باباه
لأنه خرج من بين الصلب = و الترائب لي جواه
شحال شقا و شحال تعذب = باش كبر و باش رباه
دير في بالك كل ما تمد = أنت و مالك ملك له
و من بعد خامس حب = هو الشريك لي تعيش معاه
دير في بالك نهار تتحاسب = نصف الدين هو تلقاه
تعيش معاه بلي كتب = و تتقاسمو كل شي نتا وياه
و تتعاشرو و معاه تنجب = طفل صغير لعقايب تلقاه
و هذاك الطفل سادس حب = ماتحبش ولد دون سواه
سبعة داعب و سبعة أتعب = و سبعة صاحب دور معاه
و من بعد يجي سابع حب = من رحم واحد نتا وياه
خوك خوك لايغرك صاحب = حتى الصاحب في الشدة تلقاه
و من بعد الصاحب الأقارب = و الجار لي تسكن حداه
و من بعدهم تقدر تحب = كل مومن في طريقك تلقاه
و المريض لي راه يتعذب = دقيقة واحدةاقسمها معاه
طل عليه إذا كان تحب = ربي سبحانه ثم تلقاه
و اليتيم لي فقد الأب = ولا حتى فقد يماه
مسح على راسو و بدا تحسب = في كل شعرة أجر تلقاه
و الفقير للي ما كسب = و لي ما لحق حتى قوت عشاه
واش راك تاكل واش راك تشرب = يالوكان خبزة اقسمها معاه
و زيد و زيد و لوكان نحسب = ما نيش رايح نحبس لله
يا لي مبحر شرق و غرب = و مخلي كلشي موراه
و يا لي سألتني عن الحب = بالنسبة لي هذا معناه
و إذا ما عجبكش الله غالب = روح تحوس وين تلقاه

ارجو انها
نالت اعجابكم لا تبخلوا عليا بالرد
قصيدة حب باللهجة الجزائرية...باللهجة نتاع بلادي 10631_1214545727

قصيدة حب باللهجة الجزائرية...باللهجة نتاع بلادي 10631_1214545727

]

قصيدة حب باللهجة الجزائرية...باللهجة نتاع بلادي 10631_1214543101

قصيدة حب باللهجة الجزائرية...باللهجة نتاع بلادي 0

hayla ya3tik asaha okhti layalii

من طرف **yamen** الأحد 06 يونيو 2010, 18:30

فورررررررررررررر بزااااااااااف عمبالك ابو شهاب فهمها قاع الحمد لله
تسلم ايدك يا اروع اخت اتوحشتك بزااااااااااف ربي يعيشك

de rien et merci
bcp pour le partage

ellah yselmak khoya Yamen

hata ana walah ghire twahachtek bzf

de rien ma soeur

شكرااااااااااااااااااااااااااا على المجهودات .

de rien ma soeur

قصيدة حب باللهجة الجزائرية...باللهجة نتاع بلادي 9a0e1a5704

و الله كلمات رائع شكرا

de rien ma soeur

قصيدة حب باللهجة الجزائرية...باللهجة نتاع بلادي Dg3fnlvc

وااااااااااااااااااااااااااااااااااااااااااو واش هذا الابداع ياختي من الكلمات الي اللهجة والله روووعة تسلم يديك
قصيدة حب باللهجة الجزائرية...باللهجة نتاع بلادي 5bgn.jpg_595